Futuro kan Caramoan

     Ngonian pa sana naheheling ko na an magiging futuro kan banwaan kan Caramoan. Ini an sarong lugar igdi sa Camarines Sur na maswerte huli sa primerong pagkakataon, natingkalag an lalawgon kan presidente kan nacion matapos na magvicita ini duman kan nagtalikod na aldaw. Apuera kaiyan, talagang dae pwedeng menuson an natural na kagayunan kan Caramoan. Pinagmundag na duman an inoorgolyong Gota Beach na enterong pinaghangaan ni presidente Gloria Macapagal-Arroyo. Maski ako, talagang curious na maray na masiripan an lugar. Maski dae pa ako nakaabot duman asin dae ko pa naheling an Gota Beach, talagang nagtotobod ako na ini garo paraiso asin kaya kaning malampasan ang pagiging bantog kan isla kan Boracay sa probinsiya kan Aklan asin maging an ibang pinagbabakasyunan sa iba pang mga naciones sa kinaban. Alagad sa ibong kan sakuyang isip, medyo namomondo ako huli sa ngapit na panahon, sierto na mahahalean nin prebilehiyo an ibang mga Caramoanon na ma-enjoy an kagayunan kan sadiring lugar. Ngonian na nabukasan na sa gabos an saindang namomotan na harong, nakakahandal na baka ibugtak sinda sa gilid, nagtata-naw na sana asin nagliliwoy sa sadiring kayamanan. Ini huli sa maporoonan nang magbakal nin daga an mga mayayaman orog na an mga dayuhan na rasa. Segurado na an matatawan nin prebelihiyo na mag-ogma sa lugar iyo an igwang mga cuarta.

        Pinagsasabi kan mga local na oficiales niato na mahatod ini nin pag-uswag asin matatabangan an mga residente duman na magkaigwang trabaho. Sa totoo sana, igwang mga Caramoanon na naghahalat talaga kan nasambitan na pagkakataon, na mabisto an saindang banwaan sa virhen na kagayunan. An punto igdi iyo na dae man logod malingawan an mga taga-Caramoan na harayo an swerte na magkaigwang pagbabago sa estado- an mga tios.

        Saro pa man sa dapat na mapag-adalan na maray iyo an mapapadapit sa planong pagbugtak nin airport sa Caramoan nin huli sa gulping familia an maaapektaran kani. Herak man kan mga madi-dislocate. Sinda mga tawo man asin romdomon niato, SINDA AN NAG-ATAMAN KAN CARAMOAN SA HALAWIG NA PANAHON!
                       ~~~~~~ Author ~~~~~
Jojo Pongpong is currently working at a local Radio Station and is proud of his heritage. He hails from San Jose Camarines Sur.